“பொது நலனுக்காக, நாம் தேர்ந்தெடுத்த பாதைகளுக்காக சிறை

டெல்லி முதல்வர் அரவிந்த் கெஜ்ரிவாலால் 2012-ம் ஆண்டு இறுதியில் புதிதாக தொடங்கப்பட்ட ஆம் ஆத்மி கட்சி, தொடர்ந்து 2015, 2020 டெல்லி சட்டமன்றத் தேர்தலில் தனிப்பெரும்பான்மையாக வெற்றிபெற்று, டெல்லி அரசியல் களத்தில் மிகப்பெரிய தாக்கத்தை ஏற்படுத்தியது. டெல்லியில் ஆரம்பித்த ஆம் ஆத்மியின் இந்தப் பயணம், கடந்த ஆண்டு நடைபெற்ற ஐந்து மாநில சட்டமன்றத் தேர்தலிலும் பஞ்சாப் மாநில வெற்றியோடு தொடர்ந்தது.

அடுத்த சில மாதங்களில் தேசிய கட்சியாகவும் ஆம் ஆத்மி உயர்ந்தது. இன்னொருபக்கம், கடந்த இரண்டு ஆண்டுகளில் சத்யேந்தர் ஜெயின், மணீஷ் சிசோடியா, சஞ்சய் சிங் என ஆம் ஆத்மியின் முக்கிய புள்ளிகள் சிறையிலடைக்கப்பட்டனர். தற்போது, முதல்வர் அரவிந்த் கெஜ்ரிவாலையும் அமலாக்கத்துறை வட்டமிட்டு வருகிறது. குறிப்பாக, டெல்லி மதுபான கொள்கை ஊழல் தொடர்பாக ஜனவரி 3-ம் தேதி நேரில் ஆஜராகுமாறு அரவிந்த் கெஜ்ரிவாலுக்கு அமலாக்கத்துறை சம்மன் அனுப்பியிருக்கிறது. இந்த நிலையில், பத்தே ஆண்டுகளில் 1,350 கட்சிகளில் 3-வது கட்சியாக ஆம் ஆத்மி உயர்ந்திருப்பதாகவும், நல்லது செய்யவில்லை என்றால் ஆம் ஆத்மி தலைவர்கள் யாரும் சிறைக்குச் சென்றிருக்க மாட்டார்கள் என்றும் அரவிந்த் கெஜ்ரிவால் கூறியிருக்கிறார்.