விவசாயிகளுக்கு எதிராக ட்ரோன்கள் பயன்படுத்தப்பட்டது ஏன்? பஞ்சாப்-ஹரியாணா எல்லையில் என்ன நடந்தது?

சமீபத்தில், பஞ்சாப்-ஹரியாணா ஷம்பு எல்லையில் ‘டில்லி சலோ’ போராட்டத்தில் ஈடுபட்ட நூற்றுக்கணக்கான விவசாயிகள் மீது ஹரியாணா காவல்துறையினர் ட்ரோன் உதவியுடன் கண்ணீர் புகை குண்டுகளை வீசினர். இந்தப் படங்கள் பரவலாகப் பகிரப்பட்டன.

ட்ரோனில் இருந்து கண்ணீர் புகை குண்டுகளை வீசிய இந்தியாவின் முதல் போலீஸ் படை ஹரியாணா காவல்துறை என்று ஊடக அறிக்கைகள் கூறுகின்றன. ஹரியானா காவல்துறை டிஜிபி சத்ருஜித் கபூர் கூறுகையில், ஹரியாணா காவல்துறை ஆளில்லா விமானத்தில் இருந்து கண்ணீர் புகை குண்டுகளை வீசுவது இதுவே முதல் முறை, என்றார்.

போராட்டத்தில் ஈடுபட்டுள்ள விவசாயிகள், குறைந்தபட்ச ஆதரவு விலைக்கு (எம்.எஸ்.பி) சட்டம் இயற்ற வேண்டும் என்றும், சுவாமிநாதன் கமிஷனின் அனைத்து பரிந்துரைகளையும் அமல்படுத்த வேண்டும் என்றும் கோருகின்றனர். அதே நேரத்தில் இவற்றின்மீது அவசர முடிவை எடுக்க விரும்பவில்லை என அரசு கூறுகிறது.

ஆளில்லா விமானங்கள் குண்டுகளை வீசியபோது பிபிசி செய்தியாளர் அபினவ் கோயலும் அங்கு இருந்தார். “ஆளில்லா விமானம் ஹரியாணாவில் இருந்து வேகமாக வந்து கண்ணீர் புகை குண்டுகளை வீசிவிட்டு திரும்பிச் செல்லும். குண்டுகள் விழுந்தால், விவசாயிகள் பின்தங்குவார்கள் ஆனால் உடனடியாக மீண்டும் முன்வருவார்கள்,” என தான் நேரில் பார்த்தை விவரித்தார் அவர்.

அபினவின் கூற்றுப்படி, விவசாயிகள் கண்ணீர்ப்புகைக் குண்டுகள் மீது ஈரமான சாக்குகள் அல்லது பானைகளை வைத்து, அவற்றில் இருந்து வெளியேறும் புகையை அடக்குகின்றனர். அவர்கள் ட்ரோன்களை வீழ்த்துவதற்கு காற்றாடிகள் மற்றும் காஸ்கோ பந்துகளைப் பயன்படுத்தினர். இந்த மோதலில் விவசாயிகள் மற்றும் இரு போலீஸ்காரர்கள் படுகாயம் அடைந்துள்ளனர்.

கண்ணீர்ப்புகைக் குண்டுகளை வீசுவதற்கு ட்ரோன்களைப் பயன்படுத்துவது பல தரப்பிலிருந்து விமர்சிக்கப்படும் அதே வேளையில், ட்ரோன் தொழிற்துறையினரிடையே இது மிகவும் உன்னிப்பாகக் கவனிக்கப்படுகிறது.

சுமார் 250 க்கும் மேற்பட்ட ட்ரோன் நிறுவனங்களையும், தொழில்துறையுடன் தொடர்புடைய சுமார் 2500 பேரையும் பிரதிநிதித்துவப்படுத்தும் இந்தியாவின் ட்ரோன் கூட்டமைப்பின் தலைவர் ஸ்மித் ஷா பேசுகையில், “ட்ரோன்களின் பயன்பாடு குறித்து விவாதம் தொடங்குவது இதுவே முதல் முறை. நான் விரும்பவில்லை. இது ஒரு பெரிய கவலையாக இருக்கிறது என்று நினைக்கிறேன், ஆனால் இந்த புதிய தொழில் இந்த பிரச்னையைப் பற்றி சிந்திக்க வேண்டும்,” என அவர் எச்சரித்தார்.

ஹரியானா முன்னாள் டிஜிபி டாக்டர் மகேந்திர சிங் மாலிக் பேசுகையில், “என் கருத்துப்படி, மாநில காவல்துறை இதுபோன்ற முறையைப் பயன்படுத்தக்கூடாது. மக்களுக்கு முதலில் எச்சரிக்கை கொடுக்கப்பட்டிருக்க வேண்டும், அவர்கள் பின்வாங்க வேண்டும், இல்லையெனில், ட்ரோன்கள் மூலம் குறிவைக்கப்படுவோம் என மக்களுக்கு தெரிந்திருக்க வேண்டும். இது செய்யப்பட்டதா இல்லையா என்பது எனக்குத் தெரியாது. ஆனால், அவர்கள் அவ்வாறு செய்திருக்க வேண்டும்,” என்றார்.

டிஎம்சி எம்பி சாகேத் கோகலே ஒரு பதிவில், “ஆளில்லா விமானங்களைப் பயன்படுத்தி வானத்திலிருந்து கண்ணீர்ப்புகைக் குண்டுகளை வீசி ஹரியானா காவல்துறை சோதனை செய்துள்ளது. அவர்கள் இப்போது தங்கள் உரிமைகளுக்காக அணிவகுத்துச் செல்லும் நிராயுதபாணியான விவசாயிகளுக்கு எதிராக அதைப் பயன்படுத்துகின்றனர்,”என்றார்.

பிபிசியிடம் பேசிய ஹரியாணா காவல்துறை டி.ஜி.பி சத்ருஜித் கபூர், ட்ரோன்களின் முறையான பயன்பாடு குறித்த விவாதத்தை ‘பிரச்சினை இல்லாதது’ என்று விவரித்தார்.

“கண்ணீர்ப்புகை துப்பாக்கியிலிருந்து குண்டுகளைப் பயன்படுத்த முடியும் என்றால், ட்ரோனில் இருந்து அதே குண்டுகளைப் பயன்படுத்துவது சரியாக இருக்க வேண்டும், ஏனென்றால் ட்ரோன் என்பது ஒரு தளம். இதில், முக்கியமானது குண்டுகள். அதில் ஏதேனும் பிரச்சனை இருந்தால் எனக்கு தெரியப்படுத்தவும்,” என்றார்.

தொடர்ந்து பேசிய டி.ஜி.பி சத்ருஜித் கபூர்,”குறைந்தபட்ச பலத்தை பயன்படுத்தி நிலைமையை கட்டுப்படுத்துவதே எங்கள் முன்னுரிமை. ஆளில்லா விமானங்களை பயன்படுத்துவதை நிறுத்தினால், போராட்டக்காரர்கள் நெருங்கி வருவார்கள், மேலும் பலத்தை பயன்படுத்த வேண்டியிருக்கும்,” என்றார்.

மறுபுறம், மனித உரிமைகள் அமைப்பான அம்னெஸ்டி ஒரு அறிக்கையில், “டிரோன்களில் இருந்து கண்ணீர் புகை குண்டுகளை வீசக்கூடாது, ஏனெனில் இது எதிர்ப்பாளர்கள் மீது அதிக இரசாயன விளைவை ஏற்படுத்தும் மற்றும் கூட்ட நெரிசலுக்கு வழிவகுக்கும்,” என்றனர்.

நிலைமையை சமாளிக்க விவசாயிகளுடன் பேச்சுவார்த்தை நடத்துவது குறித்து வேளாண் அமைச்சர் அர்ஜுன் முண்டா பேசினார்.

சமீபத்திய சூழ்நிலையில், பஞ்சாபிலிருந்து டெல்லி நோக்கிச் சென்ற ஆயிரக்கணக்கான விவசாயிகளை ஹரியாணா காவல்துறை ஷம்பு எல்லையில் தடுத்து நிறுத்தப்பட்டுள்ளனர். இதனால் இணைய சேவையும் பாதிக்கப்பட்டுள்ளது.

விவசாயிகளின் அணிவகுப்பு முன்னோக்கி நகர்வதைத் தடுக்க காவல்துறை கடுமையான ஏற்பாடுகளைச் செய்த நிலையில், டெல்லி காவல்துறையும் எல்லையில் பலத்த தடுப்புகளை அமைத்துள்ளது. பஞ்சாப் மற்றும் ஹரியானா உயர் நீதிமன்றம், நிலைமையை சுமுகமாக தீர்க்குமாறு கேட்டுக் கொண்டது, சக்தியைப் பயன்படுத்துவது கடைசி விருப்பமாக இருக்க வேண்டும் என்று கூறியது.

போராட்டக்காரர்களை கலைக்க நீண்ட நேரம் தடியடி மற்றும் கண்ணீர் புகை குண்டுகள் பயன்படுத்தப்பட்டு வருகிறது. ஆனால் இந்த நோக்கத்திற்காக ட்ரோன்கள் ஏன் பயன்படுத்தப்பட்டன?

ஹரியாணா காவல்துறை டி.ஜி.பி சத்ருஜித் கபூர் கூறுகையில், “கண்ணீர்ப்புகைப் பயன்பாடு காற்றின் திசையைப் பொறுத்தது. காற்றின் திசையானது கூட்டத்தை நோக்கிச் சென்றாலொழிய கண்ணீர்ப்புகைப் பயன்பாடு பயனளிக்காது. ட்ரோன் நமக்கு வரம்பையும் இடத்தையும் தருகிறது. கண்ணீர் புகை குண்டுகளை வீச சுதந்திரம் அளிக்கிறது,” என்றார்.

சத்ருஜீத் கபூரின் கூற்றுப்படி, கண்ணீர் புகை குண்டுகளிலிருந்து குண்டுகளை வீசுவதும், ட்ரோன்களில் இருந்து குண்டுகளை வீசுவதும் ஒன்றுதான்.

“கும்பல் உங்கள் மீது கற்களை வீசுகிறது. இந்த முறை அவற்றில் கூர்முனைகள் பொருத்தப்பட்டுள்ளன. அவற்றைச் சமாளிப்பது எளிதானது அல்ல, எனவே நாங்கள் கண்ணீர் புகை குண்டுகளை பயன்படுத்தினோம்,” என்றார்.

சத்ருஜீத் கபூரின் கூற்றுப்படி, ஹரியாணா காவல்துறை நீண்ட காலமாக கண்காணிப்பு, போக்குவரத்து மேலாண்மை போன்றவற்றுக்கு ட்ரோன்களைப் பயன்படுத்துகிறது.

சில மாதங்களுக்கு முன்பு, டெல்லி-குருகிராம் விரைவுச் சாலையில் ஓட்டுநர் விதிகளை மீறுபவர்களைக் கண்டறிந்து அபராதம் விதிக்க ட்ரோன்கள் பயன்படுத்தப்பட்டன.

ஹரியாணா காவல்துறை டி.ஜி.பி சத்ருஜீத் கபூர் கூறுகையில், “எங்கள் திசையில் காற்று வீசும் போது ஆளில்லா விமானங்களை பயன்படுத்துகிறோம். இதன் மூலம் கண்ணீர் புகை குண்டுகளை எவ்வளவு தூரம் வீச வேண்டும் என்பதை கட்டுப்படுத்தலாம். தூரம் காரணமாக குண்டுகளை வீச முடியாது. மிகவும் சக்திவாய்ந்த பாதுகாப்புப் பணியாளர்கள் அவர்களை 30 முதல் 40 மீட்டர் தூரத்திற்கு மட்டுமே வீச முடியும், பின்னர் அதே ஷெல் நம்மை நோக்கி வீசப்படலாம், ஏனென்றால் நாங்கள் தடுப்புக்கு பின்னால் 15 மீட்டர் மட்டுமே இருப்போம்.

“எனவே, எங்களிடம் உள்ள ஒரே வழி ட்ரோன்களைப் பயன்படுத்துவதுதான். இதனால் தான் கூட்டத்தின் பின்னால் கண்ணீர் புகை குண்டுகளை வீச வேண்டும். காற்று நம் திசையில் வீசினால் அந்த வாயு முதலில் கூட்டத்தை பாதிக்கும். நம்மை அடையாது. இதுதான் நடக்கிறது. இது ஒரு நடைமுறை விவகாரம், இதில் யாருக்கும் எந்த ஆட்சேபனையும் இருக்கக்கூடாது,” என்றார்.

மறுபுறம், ட்ரோன் தொழில்துறையுடன் தொடர்புடையவர்கள் ட்ரோன்களில் இருந்து கண்ணீர் புகை குண்டுகள் வீசப்பட்ட படங்களையும் பார்த்தனர்.

இந்தியாவின் ட்ரோன் கூட்டமைப்பு படி, நாட்டில் 300-க்கும் மேற்பட்ட ட்ரோன் ஸ்டார்ட்-அப் நிறுவனங்கள் உள்ளன. இவற்றில், மூன்றில் ஒரு பங்கு அல்லது 40% ட்ரோன்களின் உற்பத்தி தொடர்பானவை, 40 முதல் 50 சதவீதம் ட்ரோன் சேவைகள் தொடர்பானவை, அதே சமயம் 10% ட்ரோன் தொடர்பான பயிற்சி மற்றும் மென்பொருள் தீர்வுகள் தொடர்பானவை.

இந்திய ட்ரோன் கூட்டமைப்பு தலைவர் ஸ்மித் ஷா கூறுகையில், “வைரலான படங்களைப் பார்க்கும்போது, ட்ரோன்களின் பயன்பாடு மிகவும் புதியது, ஆக்கப்பூர்வமானது மற்றும் சாகசமானது. மேலும் ட்ரோன்களின் முறையான பயன்பாடு குறித்து விவாதிக்கப்பட வேண்டும் என்று தொழில்துறையில் பேசப்படுகிறது. ட்ரோன்கள் மூலம் கண்ணீர்ப்புகைப் பிரயோகம் செய்ய முடியுமா? எறிகணைகளை வீசுவது நியாயமானதா இல்லையா என்பது குறித்து சமூகத்தில் விவாதம் நடந்து ஒரு முடிவுக்கு வர வேண்டும்,” என்றார்.

தொடர்ந்து பேசிய ஸ்மித் ஷா, ஹரியாணா காவல்துறை பயன்படுத்திய ஆளில்லா விமானத்தின் படங்களைப் பார்க்கும்போது, அது 10-20 நிமிடங்கள் காற்றில் இருக்கும் என்று தெரிகிறது.

ஊடக அறிக்கையின்படி, பயன்படுத்தப்பட்ட ட்ரோன் ஹரியாணாவின் ஒரு பொது வரையறுக்கப்பட்ட நிறுவனத்தால் தயாரிக்கப்பட்டது.

விவசாயிகளின் போராட்டத்தைச் சமாளிக்க இதுபோன்ற எத்தனை ட்ரோன்கள் பயன்படுத்தப்பட்டன என்பதை சத்ருஜித் கபூர் தெரிவிக்க மறுத்துவிட்டார்.

விவசாயம், பாதுகாப்பு, கண்காணிப்பு போன்ற நோக்கங்களுக்காக ட்ரோன்கள் பயன்படுத்தப்படுகின்றன.

2014-ஆம் ஆண்டு மும்பையில் பீட்சா டெலிவரிக்கு ட்ரோன்கள் பயன்படுத்தப்பட்டன, அதன் பிறகு ட்ரோன்கள் பயன்படுத்த தடை விதிக்கப்பட்டது.

2021-ஆம் ஆண்டில், ட்ரோன்களைப் பயன்படுத்துவதற்கான புதிய விதிகளை அரசாங்கம் கொண்டு வந்தது, இது இந்தியாவில் இந்தத் தொழிலுக்கு ஒரு புதிய திசையை வழங்கியது. உலக நாடுகளுக்கு ஆளில்லா விமானங்களை தயாரிக்கும் திறன் இந்தியாவிடம் இருப்பதாக அரசு கூறியது.

புதிய ட்ரோன் சீர்திருத்தக் கொள்கையின் கீழ், வெளிநாட்டு ஆளில்லா விமானங்களை இறக்குமதி செய்ய தடை விதிக்கப்பட்டு, ஆளில்லா விமானத்தின் பாகங்களை இறக்குமதி செய்ய அனுமதி அளிக்கப்பட்டது.

ஸ்மித் ஷாவின் கூற்றுப்படி, இது நாட்டில் ட்ரோன்களின் உற்பத்தி மற்றும் அறிவுசார் சொத்துரிமைகளை மேம்படுத்தியது.

ரஷ்யா-உக்ரைன் போர் உலகிற்கு ட்ரோன்களின் முக்கியத்துவத்தை எடுத்துரைத்தது.

ட்ரோன்களின் இந்த சமீபத்திய பயன்பாடு குறித்து எழுந்துள்ள இந்த விவாதம் எந்த திசையில் செல்கிறது என்பதை பொறுத்திருந்துதான் பார்க்க வேண்டும்.